ஒளியின் முதல் துளி

என் மனையாளுக்கு
என் உயிர்த்தோழன் பெயர்
கேட்டால் பிடிக்காது
என் உயிர்த்தோழனுக்கு
என் இறைவியின் பெயர்
கேட்டால் பிடிக்காது
இறைவிக்கு என் பழைய காதலியின்
பெயர் கேட்டால் பிடிக்காது
பழைய காதலிக்கு
என்னவெல்லாம் பிடிக்காது
என்பது ஒரு நீண்ட பட்டியல்
இப்போது அது வேண்டாம்

இதெல்லாம் என் மண்டைக்குள்
பூரானைப் போல் நெளிந்து ஓடி
அட்டகாசம் செய்கின்றன

எனக்கோ எல்லாப் பெயரும்
ஒன்றுதான்
எல்லா மயிரும்
ஒன்றுதான்
ஏனென்றால்
என் கவிதைகள்
என் அன்னையின் கருவறையில் பிறந்து
நதியின் நரம்புகளில் பயணித்து
ஆழ்கடலின் மௌனத்தில் கரைகின்றன

ஒவ்வொரு பெயரும் ஒரு நட்சத்திரத்தின் துடிப்பு
நான்
இவற்றின் இடையே,
கண்ணாடியின் உடைந்த பிம்பத்தில்
ஒளியின் முதல் துளியாக
மீண்டும்
மீண்டும்
பிறக்கின்றேன்.