என்னை உங்களுக்குப் பிடிக்காது என்று தெரியும். அது பற்றி எந்தப் பிரச்சினையும் இல்லை. எல்லோரையும் எல்லோருக்கும் பிடிக்குமா என்ன? ஆனாலும் உங்களைப் பின்பற்றும் தமிழர் ஏராளமானோர் என்பதால் அவ்வப்போது உங்கள் பிழைகளைச் சுட்டிக் காட்டிக் கொண்டிருக்கிறேன். நீங்களும் என்னை உங்களுக்குப் பிடிக்காவிட்டாலும் என் ஆலோசனைகளை ஏற்றுக் கொள்கிறீர்கள் என்பதை உடனுக்குடன் கவனிக்கிறேன். உன்னைப் போல் ஒருவன் படத்துக்கு அந்தத் தலைப்புக்கு முன்னால் தலைவன் இருக்கிறான் என்ற தலைப்பு வைத்திருந்தீர்கள். அது அந்தக் கதைக்கு ஒத்தே வராது என்று எழுதியிருந்தேன். ஏனென்றால், அதில் வரும் தீவிரவாதிகளைத் தீர்த்துக்கட்டுவது தலைவன் அல்ல, ஒரு சாமான்யன் என்று குறிப்பிட்டிருந்தேன். இதை நீங்கள் படித்த பிறகு தலைவனை எடுத்து விட்டு உன்னைப் போல் ஒருவன் என்று மாற்றி விட்டீர்கள். பின்பு பாரதிராஜாவின் திரைப்படக் கல்லூரித் திறப்பு விழாவில் ஃப்ரெஞ்ச் இயக்குனர் கோதார் பெயரை கோடார்ட் என்று நீங்கள் உச்சரித்ததை விமர்சித்து எழுதியிருந்தேன். அதையும் படித்திருப்பீர்கள் என்றே யூகிக்கிறேன். ஏனென்றால், என்னைப் படிக்கும் அளவுக்கு உங்கள் உதவியாளர்கள் இருக்க மாட்டார்கள் என்பது என் நம்பிக்கை. இப்போது கூகிள் போன்ற நவீன பயன்பாடுகள் எல்லாம் வந்த பிறகு How to say Godard என்று மொபைல் போனில் தட்டினால் கோதார் என்று ஆண் பெண் குரல்களில் மாற்றி மாற்றி வரும். தெரிந்து கொள்ளலாம். இத்தனைக்கும் உங்கள் நண்பர் இரா. முருகன் நன்கு ஃப்ரெஞ்ச் அறிந்தவர். அவருக்கு ஃப்ரெஞ்ச் தெரியும் என்பதாவது உங்களுக்குத் தெரியுமா தெரியாதா?
கமலுக்குத்தான் நம்மைப் பிடிக்காதே, நாம் பாட்டுக்கு ஒதுங்கி நம்முடைய வேலையைப் பார்ப்போம் என்றுதான் இருக்கிறேன். இருந்தாலும் என் இளம் நண்பர்கள் பெரும் துடுக்குக்காரர்களாக இருக்கிறார்கள். பாருங்கள், நேற்றுதான் பிக்பாஸ் ஆரம்பித்ததாமே? அதில் நீங்கள் வாரம் ஒரு புத்தகத்தை அறிமுகப்படுத்தப் போவதாகவும் அதன் முதல் புத்தகமாக ஆல்பர் கம்யு எழுதிய பேண்டமிக் என்ற புத்தகத்தை அறிமுகப்படுத்தியதாகவும் என் இளம் தோழி ஒருத்தி எனக்கு வாட்ஸப் பண்ணி என்னை இப்போது வம்பில் மாட்டி வைத்திருக்கிறாள்.
நான் நன்றாக இருப்பது உனக்குப் பிடிக்கவில்லையா, இப்போதுதான் எல்லோரிடமும் சாபம் வாங்கி முடிந்தது, இப்போது கமல் ரசிகர்களிடமிருந்தும் ஓத்தாம்பாட்டு வாங்க வேண்டுமா என்று அவளைத் திட்டினேனே ஒழிய என்னால் வாயை வைத்துக் கொண்டு வாளாயிருக்க முடியவில்லை.
மை டியர் கமல், மன்னியுங்கள். எல்லோரையும் போல் உங்களை என்னால் சார் என்று அழைக்க முடியாது. நாம் இருவருமே கொஞ்சம் மேற்கத்திய கலாச்சார வழக்கங்களில் வாழ்பவர்கள் அல்லவா, அதனால் அதைப் பொருட்படுத்த மாட்டீர்கள் என்றே நம்புகிறேன். மை டியர் கமல், நேற்று நீங்கள் அறிமுகப்படுத்திய புத்தகத்தை இந்த உலகத்தில் யாராலும் வாங்க இயலாது. ஏனென்றால், அப்படி ஒரு புத்தகம் எழுதப்படவே இல்லை. ஆனால் நீங்கள் குறிப்பிட்ட பெயரில் ஒரு எழுத்தாளர் இருக்கிறார். ஆனால் அவர் பெயர் ஆல்பர்ட் காமூ இல்லை. ஆல்பெர் கம்யு. Albert Camus. திரும்பவும் How to say Albert Camus in French என்று போட்டால் சரியான உச்சரிப்பு வந்து விடும். உச்சரிப்பில் என்ன இருக்கிறது என்று நீங்களும் திரு காந்தியும் சொல்ல முடியாது. ஏனென்றால், உங்கள் பெயரை மேற்கத்தியர் கமால் என்றே உச்சரிப்பர். காந்தி கேண்டி. அதைக் கேட்க சங்கடமாக இருக்கிறது அல்லவா, அதைப் போலத்தான். ஆனால் உச்சரிப்பு கூட பரவாயில்லை. இல்லாத புத்தகத்தின் பெயரையெல்லாம் சொல்லி, புத்தகம் படிப்பதையே வெறுக்கும் ஒரு சமூகத்திடம் மேலும் வெறுப்பை ஏற்படுத்தலாமா? அநேகமாக நீங்கள் சொல்ல வந்த பெயர் ஆல்பர் கம்யூவின் லா பெஸ்த் என்ற நாவலாக இருக்கலாம். அதன் ஆங்கில மொழிபெயர்ப்பின் பெயர் தெ ப்ளேக். உங்கள் தகவலில் இன்னும் ஏகப்பட்ட பிழைகள். அது ஸ்பெய்னில் ஏற்பட்ட அனுபவத்தை வைத்து எழுதியது அல்ல. அல்ஜீரியா என்ற நாடு ஃப்ரெஞ்ச் காலனியாதிக்கத்தில் இருந்தது. அந்த அல்ஜீரியாவில் உள்ள ஓரான் என்ற ஊரில் 1849-இல் வந்த ப்ளேக் நோயைப் பற்றிய நாவல்தான் அது. இப்போதைய பேண்டமிக் காலத்தில் அந்த ப்ளேக் நாவல் விற்பனையில் சக்கை போடு போடுவதாகக் கேள்விப்பட்டேன். உங்களுக்கு உதவியாளர்கள் யாரும் இல்லையா? உங்கள் காலில் விழுவதில்தான் எல்லோரும் மும்முரமாக இருக்கிறார்களே ஒழிய உங்களுடைய உண்மையான well wisher இந்த உலகத்திலேயே நான் ஒருவன் தான் என்று நினைக்கிறேன். பெருமாளே, என்ன ஒரு irony பாருங்கள். எனக்கு உங்களைப் பிடிக்காது (ஹோம் வொர்க் சரியாகச் செய்யாதவர்களை எனக்கு அவ்வளவாகப் பிடிப்பதில்லை. நீங்களோ அடிக்கடி இப்படிச் செய்கிறீர்கள்); உங்களுக்கோ என்னைப் பிடிக்காது. ஆனால் நான் தான் உங்களது வெல்விஷராக இருக்க வேண்டியிருக்கிறது.
இன்னொரு துயரமான விஷயமும் இதில் உண்டு. உங்களுக்கு இப்படி விவரங்களைத் தப்புத் தப்பாகச் சொல்ல கோடிக்கணக்கில் சம்பளம். நானோ எல்லாமே ஓசியில் எழுதிக் கொண்டிருக்கிறேன். ஒரு தம்பிடி வருமானம் இல்லை.